مقالات ورأى

الدكتور احمد لبيب يكتب : لا تظلموا كابتن الأهلي

الدكتور احمد لبيب
الدكتور احمد لبيب

انا الحقيقه عشت محروق دمي يومين لوحدي ، ولأني كالعاده لا أملك الكثير من القرارات فقررت أنفث عن نفسي وأكتب عملاً بالحديث الشريف " من رأي منكم منكراً فليغيره بيده ، فإن لم يستطع فبلسانه فإن لم يستطع فبقلبه وهذا أضعف الإيمان" صدق رسول الله صلي الله عليه وسلم ،عندما يتحول الترفيه والاستمتاع إلي حرقة دم و متعمده من شخص او جهه ما ، ولو حرقة الدم دي لي لوحدي كنت ح اتكبس واسكت واحط لساني في بقي واسكت ، لكن لما حرقة الدم تصيب ٦٠-٧٠ مليون مواطن مصري يبقي لازم اتكلم واقول .

ايه اللي بيحصل مع الاهلي دا ؟؟؟

الأهلي النادي الأكبر والأكثر تتويجاً للبطولات " في جميع اللعبات وليس فقط كرة القدم"

كلنا عارفين الظلم اللي حصل في الماتش الاخير بتاع البنك الاهلي والغاء هدف و عدم احتساب ضربة جزاء وخسارة نقطتين .

ياما الاهلي اتظلم وخسر نقط و بطولات ولأن جماهير الاهلي عندها روح رياضيه ف بنقول هارد لك لفرقتنا و مبروك للكسبان .

ماهو مافيش بلوي اكبر من يوم ما اتغلبنا من صن داونز 5-0

وفي الماتش اللي في مصر الجمهور نادي علي اللعيبه و شجعهم وطلب منهم ينسوا افريقيا و يجيبوا لنا الدوري.

اومال القضيه في ايه ياحاج احمد من غير مقدمات كتير ؟

القضيه في ان رئيس اللجنه المؤقته لاتحاد الكره ، اللي فيها ٣ اشخاص للأسف من ضمنهم شاب ابن رجل فاضل الله يرحمه ، كل طنطا تعرفه وتعرف انه كان رجل جرئ ،
المهم وللأسف ان رئيس هذه اللجنة وجه كل جهاده ضد الاهلي .

واذا كانت القضيه اقتصرت علي ان الاهلي مجرد جدران ولاعبين " زي بيراميدز مثلاً"
كان مافيش مشاكلة .

انما الأهلي له جمهور بيتنفس اهلي ، وراه ٦٠-٧٠ مليون مصري ، فلما سعادتك تتعمد ظلمه، انت مش بتخليه يخسر بطوله ولا مئات الملايين بيستثمرها و بيكسب منها مليارات، ولا بتخسر البلد احد اهم القوي الناعمه المؤثره لها علي المستوي الدولي ، قوه بيتم تكريمها في المحافل الدوليه و بيذكر فيها اسم مصر ويرفع فيها علمنا الغالي و يعزف سلامنا الوطني ويقف له احتراماً كل العالم .

طبعاً انا اشك ان سعادتك عمرك ما فكرت في كل دا، ولا ألومك ، فأهتمامتك مختلفه بعيده عما اقول.

لكن حتي لو الخساره دي مش مهمه، ملحوقه وتتعوض.

لكن غير المقبول ، مهما كانت دوافعك، انك تستعدي ٧٠ مليون مصري!!!!

ليه نقضي يوم أو أكثر محروق دمنا علشان توجيهاتك للحكام ضد الاهلي، ماشي نعديها ،
لكن انك تستفز ٧٠ مليون أهلاوي و توقف كابتن الفريق ، اللي بيمثل كابتن فريق ٧٠ مليون مصري ، مش كابتن ١١ لاعب في الملعب ، توقفه و ظلم من غير حتي انذار من الحكم، يبقي سعادتك قاصد تستفزنا انا و٧٠ مليون مصري.

أنت فاهم ومدرك حجم الكارثه اللي انت بتعملها؟؟؟ انت عايز تحسسنا بإننا مقهورين؟!!

سعادتك فاهم انك تحسس مصري حر واحد بالقهر ممكن يولد فيه طاقه ضدك اد ايه؟؟ ما بالك ب انك عايز تقهر ٧٠ مليون بظلمك للكابتن بتاعهم.

ياعم دا في لاعب ساب الأهلي وراح نادي تاني مش عارف يعيش وبيصرخ مع إنه كسب لما ساب الأهلي ٢٠٠ مليون جنيه ، علشان بس فضل مصلحته علينا ، لكنه هيكره عيشته و ممكن يدخل في اكتئاب نفسي هو وعياله طول عمره.

اتعلم منه، اتنصح و الحق نفسك ، والغي العقوبه بكره في اجتماعك مع اعضاء لجنتك.

الرجوع للحق فضيله.

دي اقل حاجه ممكن ندافع فيها عن رمزنا كلنا ومن يمثلنا كلنا كابتن ال٧٠ مليون الخلوق ، والذي يحاول المجاهد ان يظهره انه خرج عن الأخلاق.

# محمد الشناوي كابتن ال ٧٠ مليون مصري.
المقالة تعبر عن رأي كاتبها

الدكتور احمد لبيب لا تظلموا كابتن الأهلي