يوميات أبو الزيك.. لا عزاء للملتزمين
يوميات ابو الزيك.. لاعزاء للملتزمين
أعتقد أن منظومة الرادارات في الطرق المصرية محتاجة تتعلم العدل والإنصاف مع البشر العاديين إللي زي حالاتي وبيحترموا قوانين المرور ، لأن بصراحة الواحد بيشوف مهازل على الطريق ، يعني مثلا تبقى ماشي في أمان الله على سرعة ٦٠ كيلو متر في الساعة وفجأة تلاقي "عربية نقل" "من غير لوحات" أو لوحات مطموسة !! جاية وراك بسرعة جنونية أقل حاجة ١٤٠ كيلو متر في الساعة ، وطبيعي جدا الواحد يزود السرعة شوية وياخد يمينه علشان "السهم المنطلق ده يعدي" وتاني يوم تلاقي رسالة على تليفونك بتقولك إن عندك مخالفة سرعة علشان سرعتك كانت ٦٥ كيلو متر في الساعة ، طيب بالنسبة للعربية النقل ألاقيها في نفس اليوم إللي جاتلي رسالة المخالفة ماشية ورايا زي الصاروخ وكأنها بتقولي "الرادار ده للغلابة إللي ماشيين جنب الحيط" .. وطبعا الحكاية دي لا تقتصر على سيارات النقل فقط ، لكنها تتكرر مع السيارات الملاكي والأجرة والميكروباص والأوتوبيسات وطبيعي جدا تلاقيهم ماشيين بسرعات جنونية ، بما لا يدع مجال للشك إن الرادار لا يراهم على الإطلاق .. ولا عزاء للملتزمين.
