بالفيديو.. مواطنون عن ارتفاع أسعار البنزين: دا خراب بيوت

مع ارتفاع أسعار البنزين والسولار، تزايدت ردود الفعل بين المواطنين في الشارع المصري، حيث قال أحد سائقي الميكروباص "الناس أصلا تعبانه، كله دا علي دماغ الشعب"،بينما قالت سيدة كبيرة "أنا كنت بركب عربية أجرة دلوقتي مضطرة أركب الأتوبيس العادي".
وقال احد السائقين: " الناس تعبانه وكله على دماغ الشعب، أنا معايا عربية أجرة لو غلى الوقود بغلي الأجرة على الركاب.. وأنا بفول بنزين 80 ومش لاقي ولما بيكون فيه يبقى زحمة خالص".
وقال سائق أخر: "ارتفاع أسعار الوقود عملية مش طبيعية دي مصيبة.. اللي إحنا فيه ده مصيبة.. لما صفيحة الجاز كانت 22 جنبية وتوصل 37 فى يوم يعنى زيادة 15 جنية فى اليوم، ولما الأسعار زادت وقفنا ومطلعناش نشتغل والشرطة جت وقالت لنا زودوا الأجرة نص جنيه، وزيادة أسعار الوقود هيكون ليه تأثير على كل حاجة.. دا خراب بيوت والزيادة والتوقيت مع بعض كان خطاء من الحكومة... ارحمونا شوية وارحموا الناس الغلابة إلى مش لاقيه تأكل.. دى الناس اتجهت للأتوبيس العام ومافيش إقبال زى الأول".
فيما أعربت إحدى ركاب أتوبيس النقل العام عن استيائها من زيادة الأسعار، قائلة: "اللي مش معاه يدفع هيعمل إيه .. هيسرق؟!! ... إنا لجأت للأتوبيس العام عشان الأسعار زادت ... الناس مش عارفة تمشيى.. كل حاجة بتغلي والى بياخد معاش 300 جنيه هيعمل بيهم إيه .. هيركب ولا يأكل ولا يدفع كهربا... حسبنا الله ونعم الوكيل فى كل مسئول ... كل الزيادة بتيجى على دماغنا إحنا".
شاهد الفيديو:

https://www.youtube.com/watch?v=ah7Z-986jSI