• الرئيسية
• منوعات

ازدادت حالات الانفصال خلال فترة الخطوبة في الآونة الأخيرة، ويرجع الكثيرون ذلك لأسباب عدة؛ لكن ما يثير الاستغراب والسخرية حقا هو أسباب يصنفها البعض بـ "التافهة"، وأرجعها آخرون إلى كون أحد الطرفين يتحجج بتلك الأسباب الواهية للانفصال.

أجاب رواد مواقع التواصل الاجتماعي، عن سؤال "ما أغرب أسباب الطلاق والانفصال التي شاهدتها؟".

"بسبب المراتب"
أجابت سمر قائلة: "كانت فقيرة وعلى أد حالها بس بنت كويسة جدا وحلوة وبتحبه وأهلها ناس طيبين، وحنينة وبتسمع كلامه وبتخاف عليه ورقيقة كل المميزات دي وسابها عشان مش هتجيب المراتب".

فيما قالت دعاء: "قال لي تقعدي سنة في البيت لحد ما ييجي من بره، تنزلي لما تروحي المستشفى أو لما تمرضي أو لو حد من أهلك مات".

"الفسيخ" 
وعلق مصطفى قائلًا: "عشان بتأرأض ضوافرها، وبتاكل فسيخ"، وأضافت آيات قائلة: "أنا أعرف حالة طلاق حصلت عشان رفضت تغسل السجادة".

وقالت أسماء: "عشان قالت له هخرج الساعة 1 وبعدين غيرت الميعاد، وبعتت له مسدج عشان تليفونه مقفول وقالت له إنها هتخرج الساعة 12".

"الصالون بتاعهم ماعجبش ماما" 
وكتبت إيمان: "كان جايلي عريس ماما رفضته عشان الصالون بتاعهم ماعجبهاش"، وذكرت شيماء: "أنا أعرف بنت فسخت خطوبتها عشان روح البيت بعد الشغل ونام ماكلمهاش".

الكوافير طلعها وحشة 
وكتبت هاجر: "كان في حد أعرفه ساب خطيبته تاني يوم بعد الخطوبة عشان الكوافير طلعها وحشة".

وعلقت لمياء: "اتفركشت الخطوبة عشان راح عندهم فجأة لقاها بتمسح، قالها وبعد الجواز هتمسحي بيتنا وأشوفك بالمنظر ده، قالت له لأ هروح أعمل سبا وأرجع أمسح".

"صباع رجليها طويل"
وأضافت دينا: "واحد عنده فيلا في التجمع وشقتين تمليك وعايز ييجي يعيش في شقتي"، وعلقت وسام قائلة: "كان صباع رجلها اللي في النص طويل، طلعت ما تنفعوش".

وعلقت منة: "عشان أم العروسة عملت عصير برتقال بيتي ما اشتريتش جاهز، وقدمته في كوبايات عادية مش في الكاسات بتاعت النيش".

"مش بيستحمى"
وصرحت نسمة: "سبت خطيبي عشان مش بيستحمى"، وقال حازم: "واحد أعرفه ساب خطيبته عشان كلمها من رقم غريب ردت عليه".

وأضاف صلاح: "اتقال لي عيب أوى تقدموا عصير الفراولة كوباية أقل من كوباية".

"ابن عمها اتصور جنبها"
وكتبت هند: "مامته صلت صلاة استخارة ومش مرتاحة لي"، وتابعت إيمان: "واحدة نعرفها الفرح اتفشكل عشان ابن عمها اتصور جنبها يوم الفرح، وهيلا هوب ورمى الطلاق".