أبو الزيك يكتب : بيب بيب أهلي .. بيب بيب زمالك

بعد يوم واحد من مباراة الأهلي والزمالك الأخيرة اتفرجت على نهائي أبطال أوروبا بين بايرن ميونيخ الألماني وباريس سان جيرمان الفرنسي وللأسف عرفت إن المسافة بين كرة القدم المصرية وكرة القدم العالمية عاملة زي لما تكون قاعد في "كفر البزرميط" ع الترعة عند "سوسو نتانة" بتضرب سندويتش كبدة متعرفش مصدرها وشوية سجق منتهي الصلاحية مع صاحبتك الشمال البت "توتو سوابق" وفاكر بقى إنك محصلتش ومقطع السمكة وديلها ، وبقدرة قادر تغمض عينك وتفتحها تلاقي نفسك قاعد ع البحر في جزيرة من جزر البحر الكاريبي مع مجموعة من الحسناوات الفاتنات بتضرب شوربة بطارخ وجمبري واستاكوزا ومنسجم آخر إنسجام ، وفجأة تلاقي نفسك رجعت تاني كفر البزرميط وكله بيتخانق مع كله وده مش عاجبه الكبده وده شايف ان السجق محصلش ..

طبعا كل الإحترام للحالتين وأكيد كل حالة لها مذاقها الخاص بس تفتكروا الواحد بعد تجربة زي دي ممكن يرجع طبيعي ولا لازم يروح يتعالج نفسيا .. ؟

أنا وبالأصالة عن نفسي شايف إنها هتفضل بيب بيب أهلي .. بيب بيب زمالك ، وعوضنا على الله في الجمبري والاستاكوزا