• الرئيسية
• فن وثقافة

تخيل لما تلاقي وحش الشاشة كاتب الكلام ده بنفسه على ضهر كتاب المفروض أنه نوع من المذكرات

طبعا ساعتها ..

هتفرك ايديك ..

وتبص يمين وشمال

وتجهز نفسك ل وليمة دسمة

أو زي ما بيقول عليها عمر طاهر

" نميمة بإذن صاحبها "

وتبدأ تقفل الموبايل ، وتفصل الكهربا عن جرس الباب

واحتمال - لو ربنا وفقك - تبعت مراتك وعيالك عند حماتك

وتدخل ع الكتاب دخلة +39

باعتبار انك اخيرا هتعرف سبب الخلاف بين

يوسف وهبي وزكي طليمات

هند رستم وفاتن حمامة

حقيقة الكلام بتاع الأخت اعتماد خورشيد

اواخر الملكية وعصر ما بعد الثورة

م الآخر كده ...

كواليس الكواليس

لكن .. وللأسف الشديد

بتتفاجئ انك قدام حوار صحفي

أو عشان أبقى أكثر دقة

هي أجزاء من مجموعة حوارات اتجمعت ف كتاب

مقالتش غير معلومات عامة

حتى الأسرار اللي جت ف ثنايا الكتاب

معتقدتش تهم حد

على سبيل المثال ومن غير حرق حواديت

أنور وجدي كان فني اكسسوار ف مسرح يوسف وهبي

أ . عماد حمدي خريج تجارة

وكان رئيس حسابات ف استوديو مصر

المساحة المهمة ف الكتاب .. ويمكن الأكبر

كانت مخصصة للسيدة / هدى سلطان

واللي كان واضح أد إيه

انها سببت له جرح فضل معاه لحد الآخر

ف النهاية

ورغم خيبة التوقعات

لكن مش هنكر اني استمتعت بالقراية

خصوصا اني قريت الكلام المكتوب بصوت فريد شوقي

اللي هو كنت حاسس بعد كل كام جمله

هلاقيه كاتب

" هأو .. ألعب غيرها يا حدق "

#ملك_الترسو